Яқиндагина Муҳаммад Салоҳ билан шартнома имзолаган “Ливерпуль” энди “Арсенал” футболчисига қизиқмоқда. Daily Mirror нашри хабарига кўра, гап Алекс-Окслейд Чемберлен ҳақида кетмоқда. “Ливерпуль” ушбу футболчи учун 30 миллион евро тўламоқчи. Яқиндагина ушбу футболчига “Челси” ҳам қизиқиш билдирганди.

“Манчестер Юнайтед” бош мураббийи Жозе Моуриньо жамоага Криштиану Роналдудан кўра кўпроқ Ҳарри Кейнни олиб келиш ниятида. Sunday Mirror нашри хабарига кўра, “Манчестер Юнайтед” ушбу футболчи учун 100 миллион фунт таклиф этмоқчи. Бироқ “Тоттенҳэм” ҳужумчини сотиб юбориш фикрида эмас. Хабарларга кўра, “МЮ” футболчига яхшигина маош ҳам ваъда қилган.

Daily Mirror нашри хабарига кўра, “Арсенал” футболчиси Тео Уолкот “Вест Ҳэм” қизиқишлари доирасида. Англия терма жамоасининг устози Гарет Саутгейтнинг 3-5-2 тактикасида ўз ўрнини йўқотган футболчи, “Арсенал”да ҳам асосий футболчи эмас. “Вест Ҳэм” эса унга асосий таркибдан жой ҳамда яхшигина маош таклиф этмоқда. Ҳозирча “Вест Ҳэм” уни ҳарид қиладими ёки ижарага олиши ҳақидаги маълумотларга аниқлик киритилмаган.

“Ливерпуль” жамоаси “Саутҳэмптон” ҳимоячиси Виржил Ван Дейк учун курашни давом эттиради. Express нашри хабарига кўра, мерсисайдликлар устози Юрген Клопп ҳали ҳам футболчини олиб келишни талаб қилмоқда. Сўнгги маълумотларга кўра, “Ливерпуль” нидерландиялик футболчи учун 70 миллион евро тўлашга рози бўлган. Бироқ унинг “Челси” сафига бориб қўшилиши кутилмоқда.

Яқиндагина МЛСга кўчиб ўтиши кутилаётган футболчи Златан Иброҳимович “Реал”га кўчиб ўтиши мумкин, деб хабар бермоқда Don Balon. Мадридликлар футболчининг агенти Мино Райола билан музокараларни бошлаган. Райоланинг ўзи швециялик футболчининг Европани тарк этмаслигини истамоқда. Футболчи ўтган мавсумни “Манчестер Юнайтед”да ўтказди.

“Эвертон” футболчиси Росс Баркли жамоадан кетиш ниятида. Бу ҳақда The Sun нашри хабар бермоқда. Англиялик футболчига айни дамда “Арсенал” ва “Тоттенҳэм”дан қизиқишлар билдирилмоқда. Росс Барклининг ўзи эса ушбу жамоадан кетишга аҳд қилган. У “Эвертон”га Деви Классен келганидан сўнг кетиш ҳаракатига тушиб қолганди.

“Ювентус” футболчиси Алекс Сандро фаолиятини “Челси”да давом эттириши мумкин. Calciomercato хабарига кўра, Лондон клуби бразилиялик футболчини олиш учун Сесар Аспиликуэтани Туринга кетишига ҳам тайёр. Олдинроқ «Челси» Сандро учун 70 миллион евро таклиф қилгани ҳақида хабарлар чиққанди. Ўтган мавсумда 38та ўйинда майдонга тушган Аспиликуэта 1та гол урди ва 5та голли пас берди.

“Реал” футболчиси Рафаэл Варан ёзги трансферлар бозори вақтида “Манчестер Юнайтед”га ўтмайди, деб хабар бермоқда Marca. У Зайниддин Зидан гаплашиб олди. Зидан эса унга янги мавсумда жамоа учун керакли футболчи эканлиги ҳамда асосий таркибдан жой берилишини айтиб ўтган.Шунинг учун ҳам Варан “Реал”да қоладиган бўлди.

“Манчестер Юнайтед” ва Жозе Моуриньо жамоага Португалия терма жамоаси аъзоси КРиштиану Роналду билан шартнома тузмайди. Daily Star нашри хабарига кўра, манкунианликларнинг трансфер ишлари билан шуғулланувчи вакили Эд Вудворд “Реал” раҳбариятига Криштиануни сотиб ололмаслигини билдирган. Криштиану Роналду солиқ идораларидаги қарзлари туфайли жамоадан кетишга аҳд қилган.

“Манчестер Юнайтед” футболчиси Антони Марсьял фаолиятини “Арсенал”да давом эттириши мумкин. Бу ҳақда Mail Online нашри хабар бермоқда. Айни дамда лондонликлар бошқа бир франциялик футболчи Александр Ляказетни ҳам олиб келишга яқин турибди. Бироқ “Арсенал” Марсьялга ҳали расмий таклиф билан чиқмаган.

Tuttosport нашри хабарига кўра, “Манчестер Юнайтед” мўлжаллаган Иван Перишич бошқа жамоа сафига ўтиш арафасида. “Интер” вингери “А” Серия чемпионлари “Ювентус” сафига бориб қўшилишга рози бўлди. “Юве” яримҳимоячи учун 44 миллион евро тўлайдиган бўлди. Олдин ушбу футболчига “Манчестер Юнайтед” ҳам қизиқиш билдирганди. Бироқ уни қўлга киритиш насиб этмади.

Goal нашри хабарига кўра, “Манчестер Юнайтед” “Монако” футболчиси Фабиньони ҳарид қиладиган бўлди. Жозе Моуриньо уни таянч яримҳимояда ўйнатмоқчи эканлигини олдинроқ айтиб ўтганди. Фабиньо “Монако” учун 180 та ўйинда майдонга тушган. Ушбу клуб учун 23 та гол уришга эришган. Бир неча кунлар олдин унинг трансфер суммаси 45 миллион еврога баҳоланганди.

“Ливерпуль” дарвозабони Симон Минолье янги мавсум борасида ўз фикрларини билдирди. “Мавсумни яхши ўтказмоқчимиз ва ўзимиз иштирок этаётган мусобақаларла ғалаба қозониш. Совринларга эга чиқишни ўйламоқдамиз. Ўтган йили бизда шундай имкон бўлган ва бундан фойдаланмагандик”, – дейди Минолье.

“Интер” ҳужумчиси Габриэл Барбозанинг агенти миланликлар футболчини ижарага беришларини маълум қилди. Бразилиялик футболчининг вакили сўзларига кўра, унга Испания ва Англия клублари қизиқмоқдалар.

Португалиялик ҳимоячи Пепе «Бешиктош»га ўтишга яқин. Туркиялик агент Аҳмат Булут футболчининг агенти Жорже Мендеш билан музокара ўтказиш учун Лиссабонга келди. «Лиссабонга Пепе учун келдим. У билан катта клублар қизиқмоқда. Бироқ, Пепе «Бешиктош»га ўтади» – деди Булут AS хабарида. Пепе туркияликлар билан 2 йиллик шартнома имзолайди. Унинг маоши йилига 5 млн еврони ташкил қилади. Бундан ташқари, 

Давомини ўқиш

“Ювентус” футболчиси Алекс Сандро “Челси”га ўтади, деб хабар бермоқда Metro. Икки йил олдин Антонио Конте томонидан 21 миллион евро эвазига ҳарид қилинган Сандро энди 61 миллионга пулланади. Айни дамда трансфер ишлари якунланиб қолган.

«Челси» клуби дарвозабони Тибо Куртуа кўпроқ маош олишни истаяпти. Daily Mail хабарига кўра, 2019 йилгача шартнома имзолаган футболчи ҳафтасига 90 минг фунт маош олмоқда. Бироқ, у бундан қониқмаяпти ва икки баробар кўпроқ даромадни истаяпти. Аввалроқ, 25 ёшли футболчи «Челси» билан янги шартнома имзолашдан бош тортгани ҳақида хабарлар чиққан эди.

“Ювентус” ҳимоячиси Леонардо Бонуччи клубдан кетмайди. Бонуччига “Манчестер Сити”, “Реал” жамоалари ҳам қизиқишмоқда. Шунга қарамай, туринликлар Бонуччини сотиб юбориш фикридан қайтган.

“Монако” юлдузи Тимуе Бакайоко “Челси” билан шартнома тузади, деб хабар бермоқда Evening Standart. “Челси” унга 35,1 миллион евро тўлайди ҳамда 5 йиллик шартнома тузади. Айрим манбаларнинг хабарига кўра, жамоа яримҳимоячиси Неманья Матич “МЮ” билан шартнома тузади. Бакайоко эса унинг ўрнига ўйнайди.

Дунёнинг бир неча гранд клублари назаридаги Алексис Санчес фаолиятини бошқа жамоада давом эттиришга яқин турибди. Daily Mirror нашри хабарига кўра, “Манчестер Сити” жамоаси вакиллари ушбу футболчи билан музокараларни якунлаган ҳамда шартнома тузилишига ишонмоқда. Ушбу маълумотга таянадиган бўлсак, “шаҳарликлар” футболчига 50 миллион фунт тўлайди.